Shumëçka mund të ndodh mbrëmjen e sotme. Një ikje e parakohshme e Cristiano Ronaldos në Botërorin e tij të fundit me Portugalinë, ose një rezultat i papritur për një prej pretendentëve të këtij turneu siç është Spanja.
Sot prej orës 21:00 nuk do të jetë thjesht një përballje e radhës, por më shumë se kaq. Në fushë do të zbresin dy prej skuadrave që dinë si dhurohet spektakël, emocion dhe ritëm të shpejtë gare, marrë parasysh edhe “yjet” që do të zbresin në fushën e lojës për të na dhuruar atë që dinë të bëjnë më së miri.
Sakaq, në anën tjetër duket se Portugali – Spanjë nuk mban thjesht statusin e një përballje magjike, por edhe atë të statistikave, së paku në ndeshjet e fundit mes tyre. Ajo çfarë kuptohet është se në derbin iberik ekziston një ekuilibër, ndaj dhe ndeshja e sotme, përveç pritshmërive dhe ambicies për të prekur çerekfinalen, do synojë edhe “thyerjen” e bilanceve.
Në këto çaste, referuar 5 ndeshjeve të fundit, Spanja dhe Portugalia ndajnë nga një fitore për kokë, ndërsa 3 sfidat e tjera janë mbyllur në barazim.
A do të kemi një rezultat që do ta përmbysë këtë hierarki? Këtë e kanë në dorë, Cristiano Ronaldo dhe Lamine Yamal, dy prej protagonistëve që do të udhëheqin sulmin e skuadrave në ballafaqimin “kokë më kokë”.
Lexo gjithashtu
