Tirana ka fituar në shtëpi përballë Egnatias, në ndeshjen e vlefshme për javën e 31-të të “Abissnet Superiore”. Sfida e zhvilluar në stadiumin “Selman Stërmasi”, përfundoi me shifrat 3-1. Pas këtij dueli ka folur zv.trajneri i rrogozhinasve, Juljan Brahja.
“Unë mendoj që Tirana ato raste që krijoi, i shënoi. U tregua ekip cinik. Ne e dinim që Tirana do të bënte mirë mbrapa dhe rastet që do të dilnin, do të shënonte. Më vjen keq, edhe ne nuk luajtëm keq, rastet i krijuam, por duhet të ishim të saktë para portës.
Pjesa e parë, normalisht që kemi manovrën tonë. Por nga krahët kishim shumë mundësi, sidomos nga Selmani, ai depërtoi. Por ndoshta edhe mbipopullimi nga ana jonë nuk ishte i mirë. Buric ishte i vetëm në zonë, mendoj se kjo na penalizoi.
Ne kërkuam krosime nga krahët, ia dolëm që të shënonim. Penalltia e shpejtë e Tiranës i dha frymë atyre dhe neve na dha goditjen. Pastaj goli i tretë na prishi planet dhe ekipi sigurisht që kalon në nervozizëm, patëm edhe gabime. Nuk e di, ndoshta duhet të ishim më të qartë para portës.
Në tranzicion, Tirana ka lojtarë të shpejtë. Në momentin që Xhixha kthehet përballë dhe jep pasimin vertikal, të kap. Ne e kontrolluam lojën, por ndoshta nuk ishim të qartë para portës.
Protestat ndaj gjyqtarëve, mendoni të hiqni dorë? Nuk mendoj, është pjesë e lojës. Një futbollist në lojë është me 200 puls. Ne nuk kemi folur me futbollistët, por janë momente loje, gjëra që ndodhin. Është e drejtë që të merremi me lojën tonë.
Ju shqetëson fakti që ju shënoi 3 gola Tirana, sulmi më i dobët? Për një njeri që nuk e ka parë ndeshjen, thotë që 3-1 Tirana e ka mbytur. Golat ishin episode, gol në korne pëson çdo ekip. Nuk dua të ndalem te penalltia, por kam dyshimet e mia”, tha Brahja.
Lexo gjithashtu
