Sfida Flamurtari – Tirana do të “çelë” javën e 30-të në Superiore, ndërsa në prag të “përplasjes” në fushën e blertë, e cila do të mbahet nesër në Vlorë, ka folur trajneri i bardhebluve Orges Shehi.
“Pushimi i kombëtareve mund të ketë ndikuar deri-diku te rikuperimet e Xhixhës dhe Tabekou, për arsye dëmtimi që ata kishin. Kurse përsa i përket ecurisë, kur e ke një ecuri të mirë, do që ta kesh ndeshjen e radhës sa më afër.
Ndeshja me Flamurtarin? Dihet që është sfidë shumë e rëndësishme për ne. Ata janë një kundërshtar që duan të bëjnë mirë. Tirana dhe Flamurtari janë dy skuadra me histori, fanelë të rëndë dhe që i kanë dhënë shumë futbollit shqiptar. Mendoj se do jetë ndeshje e luftuar dhe e bukur për t’u parë.
Gjendja e skuadrës mendoj se është e mirë. Presioni është i pranishëm si të jesh në pjesën e sipërme të tabelës, ashtu edhe në pozitat e fundit. Ndoshta kur je poshtë, për shkak të historisë, fanelës së Tiranës, ndoshta e shton pak presionin, sepse nuk është mësuar në ato pozicione.
Duhet të jemi me kokën e qetë dhe iden se çdo ndeshje do te jetë finale, duke filluar që nesër. Është moment i rëndësishëm dhe për shkak të vazhdimësisë. Kemi marrë maksimumin ndaj dy rivalëve direkt në renditje. Momet i rëndësishëm ky i tanishëm, ama jo vendimtar.
Nuk duhet të fokusohemi se kush mungon apo kush jo. Përqendrim maksimal te ajo se çfarë duhet të bëjmë në fushë. Kanë mbetur vetëm 7 finale dhe njëra nga to është nesër.
Shpresoj të marrim më të mirën e mundshme kundër Flamurtarit”. Pas 29 javësh të luajtura, Flamurtari mban vendin e fundit me 24 pikë, kurse Tirana e parafundit me 27 të tillë, çka do të thotë se ky duel do të tregoj dhe vendos shumë.
Lexo gjithashtu
