FIFA ka njoftuar krijimin e një çmimi për paqen, të cilin planifikon ta japë në shortin për Kupën e Botës më 5 dhjetor në Uashington. Çmimi, i quajtur Çmimi i Paqes i FIFA-s, do të "njohë veprime të jashtëzakonshme për paqen", tha të mërkurën organi qeverisës i futbollit.
Por presidenti i FIFA-s, Gianni Infantino, i cili ka një marrëdhënie të ngushtë me Presidentin Donald Trump, nuk pranoi të jepte asnjë përgjigje të hollësishme të mërkurën kur u pyet nëse Trump do të jetë fituesi i parë i çmimit.
"Më 5 dhjetor, do ta shihni", tha Infantino. Ai po fliste në Forumin Amerikan të Biznesit në Miami, pak pasi Trump mbajti një fjalim në të njëjtin aktivitet.
Infantino tha më herët të mërkurën se, "në një botë gjithnjë e më të trazuar dhe të përçarë, është thelbësore të njihet kontributi i jashtëzakonshëm i atyre që punojnë shumë për t'i dhënë fund konflikteve dhe për t'i bashkuar njerëzit në një frymë paqeje".
FIFA tha se çmimi, të cilin Infantino do ta paraqesë këtë vit, do të jepet çdo vit "në emër të tifozëve nga e gjithë bota".
Gianni Infantino është shprehur se shorti i Kupës së Botës "është platforma e duhur për të shpërblyer dikë që ka bërë kaq shumë, ose po bën kaq shumë, për paqen, sepse kemi nevojë që futbolli të ndihmojë pak, por pastaj kemi nevojë për liderë që e shtyjnë gjithçka drejt portës dhe për të shënuar gol".
Presidenti Donald Trump u anashkalua për Çmimin Nobel për Paqe muajin e kaluar, pavarësisht lobimit nga republikanët e tjerë, udhëheqës të ndryshëm botërorë dhe ai vetë. Kurse Infantino nuk i mbajti sekret lidhjet midis tij, FIFA-s dhe Trump në komentet e tij të mërkurën.
"Kam një marrëdhënie të shkëlqyer me Presidentin Trump, jam vërtet me fat", shtoi Infantino të mërkurën. "Kam një marrëdhënie të shkëlqyer me Presidentin Trump, të cilin e konsideroj një mik të ngushtë, por sigurisht që ai ka qenë shumë i dobishëm në gjithçka që bëjmë për Kupën e Botës."
FIFA kohët e fundit shtoi një lidhje tjetër me Donald Trump duke emëruar vajzën e tij Ivanka në bordin e një projekti arsimor prej 100 milionë dollarësh, i financuar pjesërisht nga shitjet e biletave të Kupës së Botës 2026.
Lexo gjithashtu
