Kryepeshkopi i Kishës Ortodokse Autoqefale të Shqipërisë, Anastas Janullatos, është ndarë nga jeta mëngjesin e sotëm në moshën 95-vjeçare. Ky lajm ka tronditur të gjithë, me Kryepeshkopin që ndërroi jetë në në spitalin “Evangelismos” të Athinës.
Gjendja e Kryepeshkopit ishte përkeqësuar ditët e fundit dhe për fatin e keq nuk mundi t’u bënte ballë komplikacioneve të rënda shëndetësore. Për ndarjen e tij nga jeta ka reaguar edhe Armand Duka.
Kreu i FSHF-së ka shprehur ngushëllimet e tij, ndërsa shprehet se ishte një shembull frymëzues për të gjithë.
“Me dhimbje mësova për ndarjen nga jeta të Kryepeshkopit Anastas Janullatos, një figurë e jashtëzakonshme shpirtërore dhe humane, që i kushtoi jetën e tij shërbimit ndaj njerëzve, vlerave të paqes dhe bashkëjetesës.
Kryepeshkopi Anastas ishte një udhëheqës shpirtëror i cili, përmes urtësisë dhe përkushtimit të tij, solli një kontribut të jashtëzakonshëm në konsolidimin e Kishës Ortodokse në Shqipëri dhe në promovimin e harmonisë ndërfetare, që është kaq e çmuar për shoqërinë tonë.
Si President i Federatës Shqiptare të Futbollit, shpreh ngushëllimet e mia më të sinqerta për Kishën Ortodokse Autoqefale të Shqipërisë dhe të gjithë ata që gjetën frymëzim dhe mbështetje tek Ai.
Në këtë moment të vështirë, le të kujtojmë mesazhet e tij të dashurisë dhe mirëkuptimit, që mbeten një shembull frymëzues për të gjithë ne. Kujtimi i tij do të jetojë gjithmonë si një dritë shprese dhe paqeje.
Qoftë shpirti i tij i qetë në paqe të përjetshme!
Me respekt dhe solidaritet,
Armand Duka”, ka shkruar Duka.
Lexo gjithashtu
