Këtë mesjavë u përcaktuan ndeshjet çerekfinale të Uefa Champions League. Një sërë duelesh të forta që pritet të dhurojnë emocione të jashtëzakonshme në përballjet të cilat do të luhen më 8 dhe 14 prill.
Paris Saint-Germain-Liverpool dhe Real Madrid-Bayern Munich janë dy prej sfidave të quajtura dhe si "finale" të parakohshme, ndërsa vlen të përmendet dhe dueli mes Barcelonës dhe Atletico Madrid, një klasike e vërtetë spanjolle në këtë fazë të rëndësishme të këtij kompeticioni.
Gjithashtu, edhe Arsenal do të përballet me Sportingun e Lisbonës, me këta të fundit të cilët eleminuan "surprizën" Bodo/Glimt pas një rikthimi të çmendur në Portugali.
Por, si paraqiten momentalisht kuotat për fitimin e trofeut më të lakmuar në Europë dhe kush prej 8 skuadrave pozicionohet më e favorizuar në këtë fazë si pretendente për të ngritur lart kupën veshgjatë? Sipas Polymarket, skuadra e Mikel Artetës ka më shumë gjasa që të shkojë drejt finales dhe të fitojë në Budapest trofeun e parë në histori, ndërsa pas tyre renditen gjermanët e Bayernit.
Top treshen e plotëson Barcelona, e cila pas fitores së thellë në shtëpi ndaj Newcastle me rezultatin 7-2, shpreson të fitojë Championsin e 6-të pas gati 11 vitesh mungesë.
Renditja plotësohet nga PSG-ja, Real Madrid, Liverpool dhe Atletico, ndërsa për Sportingun, kuotat thonë se do të duhej një mrekulli që ata të shpalleshin kampion, pasi kjo skuadër ka vetëm 1% mundësi t'i shkojë deri në fund këtij trofeu.
View this post on Instagram
Lexo gjithashtu
