Kampionia e Shqipërisë, Egnatia, ka mësuar kundërshtarin e saj në raundin e parë kualifikues të UEFA Champions League.
Shorti i hedhur sot në selinë e UEFA-s në Nion të Zvicrës përcaktoi që skuadra rrogozhinase të përballet me Petrocub, kampionen e Moldavisë.
Ndeshjet e para të këtij turi do të zhvillohen më 7 dhe 8 korrik, ndërsa takimet e kthimit do të luhen më 14 dhe 15 korrik.
Sfida e parë do të luhet në Moldavi, ndërsa ndeshja e kthimit do të zhvillohet në “Egnatia Arena”, ku kampionët e Shqipërisë do të synojnë kualifikimin në turin e dytë të kompeticionit më prestigjioz për klube në Europë.
Fakti që takimi i dytë do të mbahet në Rrogozhinë, e ku do përcaktojë edhe ekipin e kualifikuar, rrit më shumë besimin dhe jep “spunto” te kampionët e Superiores për avancim, aty ku objektivi minimal janë grupet në Kupat e Europës.
Lexo gjithashtu
