Federata Shqiptare e Futbollit mori pjesë në Konferencën “UEFA Grow për Burimet Njerëzore dhe Menaxhimin Financiar”, e organizuar më parë në Varshavë, Poloni, me pjesëmarrjen e përfaqësuesve të federatave europiane të futbollit.
Konferenca u fokusua në çështje që lidhen me menaxhimin e burimeve njerëzore dhe financiar brenda federatave, strukturat organizative, proceset e brendshme, planifikimin strategjik si edhe sfidat që lidhen me zhvillimin institucional dhe rritjen e efikasitetit operacional.
Gjatë sesioneve të ndryshme të punës u diskutua gjithashtu mbi menaxhimin e marrëdhënieve financiare me shoqatat rajonale dhe lokale të futbollit, përmirësimin e menaxhimit të të dhënave financiare, si edhe ndryshimet transformuese në fushën e Burimeve Njerëzore.
Federata Shqiptare e Futbollit u përfaqësua në këtë aktivitet nga Drejtori Administrativ, Aldi Topçiu, Drejtorja e Financës, Irma Zëri, si dhe specialistja e Departamentit të Financës, Marilda Mema.
Në kuadër të konferencës dyditore, Drejtori Administrativ i FSHF-së, Aldi Topçiu, mbajti edhe një prezantim mbi evoluimin e organigramës së FSHF-së ndër vite, duke ndarë me pjesëmarrësit eksperiencën e Federatës Shqiptare të Futbollit, arsyet e ndryshimeve strukturore dhe sfidat kryesore të hasura gjatë këtij procesi zhvillimi institucional.
Pjesëmarrja në aktivitete të tilla ndërkombëtare përbën një mundësi të rëndësishme për shkëmbimin e eksperiencave dhe praktikave më të mira mes federatave europiane, si edhe për forcimin e mëtejshëm të kapaciteteve administrative dhe financiare të FSHF-së.
Lexo gjithashtu
